‘युक्रेनकै जित हुनेछ’ भन्दा उनलाई रुसी भाडाका लडाकुले ठोके गोली

तिमोफी माइकोलायोभिच सादुरा, उनी गत डिसेम्बरमा सेनामा भर्ती भएका थिए

A+ A A-

रुसले युक्रेनलाई आक्रमण गरेयता दुवै पक्षका सेनाहरूको ठूलो संख्यामा हताहती भइसकेको छ । रुसका झन्डै दुई लाख र युक्रेनका एक लाख जनाले यो युद्धमा ज्यान गुमाइसकेका छन् ।

अहिले युद्ध जारी रहेको एक वर्ष पुगिसकेको छ । यद्यपि, अझै पनि उनीहरू युद्ध गरिरहेका छन् । रुसी आक्रमणबाट ३० हजार सर्वसाधारण मारिएका छन् । कतिपय स्थानमा रुसी सेनाले नियन्त्रणमा लिएरै सर्वसाधारणको हत्या गरेको युक्रेनी राष्ट्रपति भोलोदिमिर जेलेन्स्कीको भनाइ छ ।

उनले रुसी राष्ट्रपति भ्लादमिर पुटिनलाई युद्ध अपराधको मुद्दा लगाइनुपर्ने बताउँदै आएका छन् । यसक्रममा यस हप्ता पनि रुसी सेनलो युद्ध अपराध गरेको पाइएको छ । वालस्ट्रिज जर्नलका अनुसार रुसी सेनाले भिडियो खिचेरै एक युक्रेनी सेनाको हत्या गरेका छन् । हतियारविहीन र रुसी सेनाकै नियन्त्रणमा रहेको समयमा उनको हत्या भएको हो ।

उक्त घटनाको भिडियो सार्वजनिक भएसँगै यतिबेला रुसको विश्वभरबाट विरोध पनि जारी छ । जर्नलका अनुसार रुसी भाडाका लडाकु वाग्नर समूहले उनलाई नियन्त्रणमा लिएका थिए । मृत उनको पहिचान खुलिसकेको छ ।

उनको नाम तिमोफी माइकोलायोभिच सादुरा हो । सन् १९८२ मा मध्य युक्रेनमा जन्मिएका उनी युद्ध सुरु भएपछि गत डिसेम्बरमा सेनामा भर्ती भएका थिए । यतिबेला उनलाई युक्रेनमा एक सच्चा देशभक्त व्यक्तिका रूपमा सम्मान गरिएको छ ।

मृत्यु हुनुभन्दा अगाडि उनलाई सिगरेट पिइरहेको देख्न सकिन्छ । उनले युद्धमा युक्रेनकै जित हुने बताएका थिए । त्यसपछि उनलाई गोली हानी मारिएको थियो ।

प्रकाशित मिति: बुधबार, फागुन २४, २०७९ १८:००