दुर्व्यवहार गर्ने प्रहरीलाई कारबाहीको माग राख्दै पत्रकार आन्दोलित

A+ A A-

पत्रकारलाई कुटपिट तथा दुर्व्यवहार गर्ने प्रहरीलाई कारबाहीको माग राख्दै आन्दोलनरत वीरगन्जका पत्रकारले आज पनि सडकमा धर्ना दिँदै प्रदर्शन गरेका छन् । दोषी प्रहरीलाई कारबाहीको माग गर्दै आन्दोलनरत नेपाल पत्रकार महासंघ पर्सा शाखाको अगुवाइमा पत्रकारले घण्टाघर चोकमा १ घण्टा धर्ना दिँदै प्रदर्शन गरेका हुन् ।

यसअघि सोमबार पनि घण्टाघरमै पत्रकारले प्रहरी ज्यादतीको विरोधमा आधा घण्टा धर्ना दिएर प्रदर्शन गरेका थिए । मङ्गलबार बिहान १० देखि ११ बजेसम्म घण्टाघर चोकस्थित सडकमै धर्ना दिएका पत्रकारले जिल्ला प्रशासन कार्यालय पर्सामा पुगेर ज्ञापन पत्र पनि बुझाएका छन् । महासंघको पर्सा शाखाका अध्यक्ष श्याम बन्जाराको नेतस्त्वमा प्रमुख जिल्ला अधिकारी विष्णु कार्कीलाई ज्ञापनपत्र बुझाएको छ । सो ज्ञापनपत्रमा पत्रकारलाई कुटपिट र दुर्व्यवहार गर्ने प्रहरीलाई कारबाहीको माग गरिएको छ ।

वीरगन्जको नारायणी एफएम र नयाँ पत्रिकाका संवाददाता तिवारी यादवलाई प्रहरीले गत आइतबार एफएम स्टेशनबाटै पक्राउ गरेर हातपात पनि गरेको थियो । ४ घण्टासम्म प्रहरी हिरासतमा राखिएका पत्रकार यादवलाई, पत्रकार महासंघको दबाबपछि भने प्रहरीले रिहा गरेको थियो । घटना भएको ३ दिन बितिसक्दा पनि घटनाको बारेमा छानबिन गरी दोषी प्रहरीलाई कार्वाही नगरेपछि पत्रकार आन्दोलित भएका छन् ।

दोषी प्रहरीलाई कार्वाही गर्न जिल्लाका प्रहरी प्रमुखले कुनै चासो नदेखाएपछि न्यायका लागि बाध्य भएर मङ्गलबार प्रमुख जिल्ला अधिकारीलाई ज्ञापन पत्र बुझाइएको महासंघ पर्साका अध्यक्ष बन्जाराले बताए । '३ दिनको अल्टिमेटमसहितको ज्ञापन पत्र बुझाएका छौँ’, उनले भने, ‘३ दिनभित्र दोषी प्रहरीलाई निलम्बन गरि विभागीय कारबाही भएन भने अझ सशक्त आन्दोलनमा उत्रिन्छौँ ।’

ज्ञापनपत्र बुझ्दै प्रमुख जिल्ला अधिकारी कार्कीले पत्रकार महासंघको मागका विषयमा सम्बन्धित प्रहरी प्रमुखको ध्यानाकर्षण गराउने आश्वासन दिए । प्रहरीले कुटपिट गर्दै पक्राउ गरी ४ घण्टा हिरासतमा राखेर रिहा गरेका पत्रकार तिवारी यादवको मोबाइल, प्रहरीले फिर्ता नदिइ ३ दिनदेखि आफ्नो कब्जामा राखेको छ । गत आइबार पत्रकार यादवलाई पक्राउ गर्ने क्रममा प्रहरीले ३ थप्पड हिर्काउँदै उनको मोबाइल खोसेको थियो । तर, घटना भएको ३ दिन बितिसक्दा पनि यादवको मोबाइल प्रहरीकै कब्जामा छ ।

मङ्गलबार प्रजिअलाई ज्ञापनपत्र बुझाउने क्रममा पत्रकार महासंघ पर्साका अध्यक्ष बन्जाराले भने, ‘खोसेर राखेको मोबाइल ३ दिनदेखि प्रहरीकै कब्जामा छ, प्रहरीले पत्रकार यादवको मोबाइल दुरुपयोग गरेर उनलाई अर्कै कुनै झुठा अपराधमा फसाउने षड्यन्त्र गरिरहेको आशंका हामीलाई छ । यदि पत्रकार यादवलाई न्याय दिनुको सट्टा कुनै झुठा अपराधमा फसाउने दिवा सपना प्रहरीले देखिरहेको छ भने त्यो प्रहरीकै लागि आत्मघाती हुनेछ, यो कुरा प्रहरीले अहिले नै बुझे हुन्छ ।’

पर्साकी प्रहरी उपरीक्षक गंगा पन्तले भने घटनाका विषयमा अनुसन्धान भइरहेको र अनुसन्धानमा दोषी देखिए मातहतका प्रहरी कर्मचारीलाई नियम अनुसार कारबाही हुने बताइन् ।

प्रकाशित मिति: मंगलबार, वैशाख ३०, २०७७ १८:०५